見習爸媽手記五 - 游泳初體驗

初體驗的並唔係面包，係米豆。米豆第一次帶面包去游水。同行的仲有豆媽。

本來豆媽唔諗住去，不過我話大家都係去浸下水，無所謂啦，豆媽就一齊去喇。

為左同面包去游水，豆一放工9秒9去搭車返屋企換衫，最後等埋米就8點半入場。

對於小朋友真係有d夜，不過無辦法，我地就只有呢幾小時既時間同面包相處。

事前去左百貨公司買游泳尿片，三十幾蚊有三塊。都係之前去買面包超人玩具時，同店長媽媽傾談既時候知道既。本來都諗住落街買面包超人水泡，最後買唔到而買左鬆弛熊既坐坐水泡，亦都帶左面包超人浮板。

入到場面包都唔怕水行落去，不過就唔肯坐鬆弛熊，無論係深水定淺水。喊到全場都聽到。

- 深水定義係到面包條腰，淺水定義係到面包膝頭。

最後面包都係抱住玩下滑梯，周圍行下同潑下水。除左個鬆弛熊，其實佢都幾開心既。

如果下次去要買返件泳衣俾佢，仲有水袖啊，水桶玩具等等。

見習爸媽手記四 - 退朝

話說，面包比我早返到屋企。而米又去左釣魚夜歸…

我返到屋企入門個一刻，面包食住飯然後望住我嗌我。

個刻好感動啊，因為面包未試過我一入門口見到我就嗌我架！

不過…佢緊接既第二句係︰「米米呢？」

晴天霹靂啊，原來佢唔係搵我…只係搵米米…我答佢米去左釣魚夜少少返之後，佢用一個「你退下啦」既口吻講左句：「嗯。」跟住繼續食飯，眼尾都無再望下我…

好傷心啊…面包叫我退朝了。

見習爸媽手記三 - 嚎哭搵米米

呢篇新鮮滾熱辣要出左先再慢慢細數當年小時候。話說面包尋日見米米返黎，初頭都無野既，只不過過左一陣之後…因為米豆要返房執野要開床板，面包見狀就想入埋黎喇。起初，我叫佢企係門口做監督，怕佢行入黎整親佢，點知佢愈行愈入要搵房入面既米…

米就梗係叫我抱返佢出去啦，因為怕整到佢架嘛。點知當我一抱佢出廳放低轉身，佢就好似轉身射個三分波咁飛快咁跟住我，我一刪門而佢見到刪門個刻就黎料喇，係咁喊…任由咁岩上黎探我地既豆姨乙水極都係收唔到聲。

機會黎喇飛雲！米叫我拎個喼出廳時，面包一見到開門佢就衝入黎，我諗住作狀嚇下佢　「我刪門喇！」，佢竟然同我講byebye然後幫我刪門…………

最後，佢係要企係度陪住米直到佢行返出廳佢先肯行返出黎，個一刻，我真係覺得我好似第三者…

見習爸媽手記二 - 佢以為我死左?

大概係面包9個月大既時候，一個懶洋洋既下午，豆我一個人訓係張床到hea既時候，唔知面包做乜突然破聲大哭，係好傷心個隻既樣。

初時我都以為佢pupu 或者vivi 啦，因為佢到呢個時候都係未識扮野喊既。但檢查過唔係，而佢又無喊咁我就訓返底，點知呢…一訓底佢又黎過，好淒涼個隻。仲係咁用兩隻手推我肚腩同埋伏係我心口，個情景就好似d電視劇d男女主角見到對方而左係病床前個d情景…

個刻其實我唔知佢做乜，不過佢真係喊得好淒涼，我唯有起身乙水返佢，而面包見我坐返起身梗係伸手攬住我啦。

不過其實我真係唔知佢喊乜，個下佢見到d乜所以突然喊。

見習爸媽第一回 - 故事的由來

那一年，米豆仲拍緊拖，叫做準備下結婚既事既時候…

有個夜晚豆媽叫豆去灣仔有間酒樓接一個小妹妹，哦！好啦，幫下手o者。就係咁樣既第一次，豆同呢個小妹妹見面。記得對上一次照顧BB已經係已經係而家中學既表弟，個心呢刻好15 16。

去到見到呢位俾人圍住既小妹妹，佢望住幫佢換緊片既一班媽媽級，露出好幸福既微笑，好乖啊，無喊喎！

好喇！豆媽叫豆揹起揹帶揹佢出去照顧佢啦，哦！好啊！好奇妙啊！佢望住我笑啊！佢望住我笑？佢真係望住我笑喎！ 我個心其實更加17 18 19 20。

當我地兩個行到o係條街度既時候，我同佢講︰你好啊，我地做朋友啊。

我心入面好驚佢喊會俾人以為我係鴉烏婆。

然後佢好支力，未過馬路就訓著左。

我記得當時係唔敢大郁，同一定係用手抱實佢怕佢整到既。之後，米趕過黎，我地兩個望住呢粒同隻貓無分別既小妹妹，好緊張，好21 22 23 24。帶佢去食飯，帶佢去行街，原來遇見大家都有小朋友既爸媽，有一種比此加油打氣既眼神，再回望自己心愛寶貝既孩子。

當日，我有個以後都未必會再見既道別心情，所以同佢影左幾張相，佢就俾豆媽接走左喇。

佢返去搵佢既爸B媽咪。

因為有好多原因，大家都幫手照顧呢位小妹妹，米豆只係其中既一位…

呢個時候，面包只有兩個月大。

我地既願望，同佢既爸B媽咪一樣，希望佢快高長大，俾多d愛佢，希望佢聽教聽話，有一個好多人愛錫既童年，無論佢日後遇見乜野事，乜野人，都可以真誠去面對，做一個正直既人。