Candy Corner二 + 主題顏色二 - 繼續Doilies 茶點套裝

Doilies真係一個好地方，肥妹又為candy corner添置兩件tea set套裝，要黎放cup cake或曲奇之用。

望落都覺得好靚，到時再加d裝飾，掂哂。

除左Tiffany Blue X Pearl White之外，金色都係我地既主題色之一，由其banquet！因為我地唔想揀紅色，但Tiffany Blue配金色又出奇地夾，老人家又實鍾意，搞掂。

- 肥妹豆字

裙褂一 - 由上海街出發

難得米少放假，可以陪下我呢個肥妹，一月時我地突然挑起條根走左去搵裙褂，諗住睇下裙褂係咩樣，咩價錢。

未去之前，肥妹一直都係諗住搵老店組褂既，TBB電視成日都係咁拍某一間架啦。最初，肥妹仲以為最老係佢，search左資料先知原來最傳統既老店係冠南華，連米少都知，唉﹗

好喇，冠南華我地無去度，一黎我地去到油麻地好似盪失路咁，二黎上網search資料已經話冠南華係最貴。不過，貴係貴得有道理，手工好，質地好，cutting好。就算唔係頭褂，著左幾次雖然d金線係無咁令，相對啞色左，但望落依然好新，又得體。又有專門熟手老師傅補線。不過褂皇頭褂租要過萬，小五福都三千幾，聽落我地已經呆了。千嬅結婚時就係係度訂造架喇，雖然咁不凡，但係太貴，我地都係轉移目標。可能綉花鞋係度買啦，到時再決定。

另外一間我地無考慮既係鴻運，因為好多comment都唔多好，貴又拍得住冠南華，一比手工款式就被分高下，職員態度又唔係咁好。

首先我地第一間有睇既係永隆，我地去到個陣發現有好多新人係度試褂，睇相。我地就好似黎運吉咁，左睇右睇。d姐姐都幾好人，簡介左俾我地聽褂既分別，呢度租一套褂皇要三千幾四千，都正常既。不過我地見到其他新娘試小五福較多，相對當然價錢又相宜好多啦。

但我地覺得，老人家應該想揀件貴氣d，所以我地個刻就諗住算啦，再比較下。

第二間去既係錦發，無想到有意料之外既收獲，姐姐好人不在講，佢都真係實話實說，唔係hard sell，係唔得既佢都講得幾串下。一去到我地都係主力問褂皇，但姐姐話肥妹你咁大隻，褂皇咁多線，著起仲肥仲大隻。姐姐你呢句都幾傷肥妹心XD。

姐姐俾左一件大五福肥妹試，米少一望到呆到變石像，個感覺好得意，姐姐話著大五福就好睇喇，仲俾左個優惠價我地，不過因為我地未選婚期，所以就算決定都唔落訂住，阿姐姐話會封褂架。真唔真唔知，不過如果真既阿姐姐唔知要封到幾時。呢件大五福都係千幾蚊，不過2013加價，價幾多就唔知了。姐姐話肥妹呢d身型有得揀既唔多，真係買定離手喇﹗到時無褂要訂造就三千幾銀頭褂架喇。姐姐最後仲話，你兩個咁大隻，真係襯到絕﹗姐姐，你好傷肥妹心呀。

姐姐，我地決定左婚期實返黎搵你架，你等我地呀！

- 肥妹豆字