新郎禮服二號 - Made in 祥興

做完第一套禮服，米豆轉移左地點，去左好多好多好多人去既祥興。好多B2G，爸爸，細佬，返工人士都係度做，就連以前既官都係度做，豆返去同豆姨傾計時，豆姨話豆姨丈舊陣時都係度做。真係好西利！

米豆就膽粗粗上左去，不過，其實呢日豆辛苦到訓係度。事關豆胃炎，而咁岩米放假，咁難得既平日就梗係食左藥之後攬住個肚出去喇，因為祥興多人到平日下晝都要排隊，星期六日驚見唔到龍尾。

不過去到先記得師傅2點至3點放飯，咁米豆唯有去睇下其他野，終於就去左睇Debeers 同Tiffany介子，亦都決定買Debeers, 呢個遲下再開文講啦。

等到三點過了米豆就上去，米睇錯地圖帶左豆上第二店，係無師傅在場架！各位都記得啊，要度身就要去總點先有。而米豆上到去都有幾個係度排隊啊坐呀，等試衫，揀布，等下師傅度。所以其實米豆上到去係無人理既！最後望下個堆布版山就搵到布就去排隊度身。最後揀左一隻暗黑小格子同一隻暗紅紋。我地問唔係度身個師傅俾意見佢唔show我地。唉。明既明既。

最後都係排兩三個度身，度身個師傳還好，我地問小格子做踢死兔得唔得，佢就話禮服就梗係做全黑色啦，咁先夠尊重道嘛。所以最後就決定做件英式踢死兔用全黑布既，另外紅色暗紋就做一套中山裝。

師傅講得最多既係『著到我地既西裝你就醒目喇，做經理喇』 XD


而之後等等等電話，師傅話9月尾真係9月尾到最尾個兩日先打俾米去試殼，老鋪就係有呢度好，係會造件殼出黎先。咁米都好乖仔自己放假上左去度身，佢度完身話都好FIT下，著出黎高左，Slim左，不過想再修一d試殼師傅就話唔好喇，因為米有個小肚腩，再修會突肚喎。不過米無影試身相，不過話著出黎真係好掂，由其件紅紋中山裝，著出黎打燈超型，可以接新娘同敬酒著XD

而試殼師傅話十月中就有得拎喇。好期待呢！

- 豆字

新郎禮服一號 - Made in Billy & Betty

好喇，就係7月個陣，米豆行去旺角中心去B&B度睇既時候，米就鍾意左佢地既質料，好通爽既Wool。

所以8月，米豆就去左搬左新鋪既B&B度身訂造一套影Pre-Wedding既，要求係平時米都可以著得返工。

經過米豆對上次件藍格格咁念念不忘，最終都係做返呢套，另外仲做多件背芯同一條褲。總數四千幾。不過，料係值既，聽聞比So boss d料同等價錢要好，大家比較既時候可以留意下。

豆呢d女人仔梗係好留心去同老闆娘傾計，而老闆就同米度身，好利害啊，因為老闆度得好準，而都不受我地影響。

過左兩個禮拜都無，就打俾我地去拎喇，今次仲帶埋伴郎去睇，而做出黎都好岩身，著出黎slim左，唔洗再改。米豆都決定budget許可既會做多套天鵝絨。正！

米話要chok返下。XD

- 豆字

首飾四 - 去Artini掃貨

呢篇出遲左成個月咁濟，其實on sale promotion都過左，唔知而家仲有咩promotion呢？
之前睇wow友，﹙wow真係為大既發明，有好多B2B share平靚正野。﹞講Artini旺角新世紀店因新世紀成行飾物店被收回，所以都清貨，Artini有部份都去到3折，所以就去望下。

7點幾豆先去探路睇幾點收，不過個sales姐姐就唔係好好樣喇。
到9點幾既時候，米豆一齊再去，得返一個後生d既sales 姐姐，佢相對地好好人。
行哂全間鋪玩左好多飾物，其實本身想搵頭飾可惜無，所以轉攻咩都睇一餐，有好多唔錯既款因為有蝴蝶所以唔揀，因為豆嫲唔鍾意。
最後就揀左下面既野喇，總數三千幾，sales姐姐仲幫我開多張9折vip card，不過豆諗都無乜機會用，咁貴！

左邊既花花係一套，而家事後先諗點解唔買埋條頸鍊，但又唔記得係咪當時帶過唔鍾意。不過最後就係買左一對耳環一條手鍊同一隻介指。右邊既頸鍊無一套款，只有單呢條頸鍊，而仲有隻金珠介指都無其他套裝，又或者其實係俾人買哂，不過事後返到屋企見到隻珠介指甩左粒石，問過sales姐姐話要收返10%維修費T___T。

其實呢兩合野係想過大禮時加埋落去充撐下場面，又會唔會好過份呢？

sales姐姐仲俾多幾個袋仔裝住飾物，一件一個唔好爭。

- 豆字

Toasting flute 一號 - 最後決定Vera Wang

星期一，期待國慶假期的來臨，米同伴郎跟豆一齊食飯過下節，就咁，就因為咁就諗住去誠品買個對香檳杯喇。

點知…豆提議不如行多次Sogo睇下有無新發現，就係咁就同誠品個對講再見。

行一圈Sogo既時候，對Baccarat無show出黎，米話『俾人買左架喇！』，又見到有對Givenchy金色邊邊，不過都係千幾一隻，好貴啊！ 最後又係行返去Wedgewood，見到多左好多對Toasting flute，見到有對好似小時藍色邊通花米型圖案既，好特別，又食正『米』字。再行哂成間，米竟然話要Vera Wang個對。

再拎埋米杯黎比對下，米都係話要Vera Wang！！！！

係Sales面前話，因為Vera Wang呢對金屬柄，拎住無咁易爛。但對住豆既時候佢話『誠品個對都588，加少少就買到Vera Wang，同你件婚紗一樣牌子，LV同LB既分別，梗係買LV啦！』

呢對flute價錢係600大元，之前有set而家無喇。

我係咪應該開心呢？

- 豆字

Toasting flute 二 - 誠品低調的浮華

豆講咩呢，其實係咁既，上星期行誠品買一本wow友介紹自拍既書，行經家品既時候，見到一對香檳杯，豆依然對個對夜藍色水晶杯好著留戀，但三千幾太貴喇！而誠品呢對588，六分一既價錢。

點解睇中佢呢，就好似題目咁，正面望落去真係好普通，係杯身係玻璃，杯柄係銀色金屬。浮華係邊呢？就係杯底既面上，鋪上左一層既閃石。突然型左。

米都話幾好架，不過豆就又搏佢減價遲d先買，所以最後就左，又有sales係度影唔到相，大家想睇就去誠品10樓望下。

- 豆字

Toasting flute 一 - Baccarat的夜藍

之前見到wow jm話sogo有Vera Wang既Toasting flute，即刻就同米講，不如去睇下囉。

終於上星期米同伴郎就陪左豆去睇。去到其實無咩『係你喇』既感覺，Wedgwood亦都只係得3個款，其中一對當然就係wow jm買左既個對，不過基於豆嫲唔喜歡蝴蝶既關係，所以米豆都無將呢對放落候選列，不過價錢真係抵，600蚊買到一對Vera Wang……諗起同The One同牌子就開心。

米提議不如再行下，橫掂呢度有幾間，可能會見到其他真係有『係你喇』既感覺。不過其他既價錢都過千，有d仲係千幾蚊隻，或者係好普通既款，一d心動都無。

行行下行到去Baccarat，行完一圈後米手中拎住一隻，起初豆都無咩感覺，sales姐姐好好服務拎哂所有色俾我地睇，無錯，係全店呢個垓有既所有色。米豆，伴郎都一致認為隻紫藍色係最好，好有『係你喇』既感覺。但豆另外一邊就係米隔離扯衫尾，因為一隻都要千七，兩隻就三千四喇！三千四買一對藍色既toasting flute，sales姐姐都話結婚買呢隻色唔係幾好囉！但對於多人揀既既黃色同綠色，米豆都無感覺。而豆梗係仲扯緊衫尾。終於sales姐姐好好人咁叫我地不如寫低個no.。都係無錯，佢提議抄俾我地。不過，佢個樣都係唔憂做，個樣已經話左俾我地知，你唔買大把人黎買。亦都無折，只係lane crawford同 AE黑卡先有個9折。

豆返到屋企係咁問米係咪好鍾意，如果真係好鍾意好有感覺，一年拎出黎用一次好有紀念食一餐飯用都可以既。當然米又話唔係，佢答左我一個好意料之外既答案『買酒都有得送啦，唔洗三千幾蚊得個擺，一年用一次』當然佢都反問豆係咪好鍾意，見豆對眼發青光咁。

應該理智d定係真係買呢對好有心跳感覺既Toasting flute呢…但真係好貴好貴好貴好貴…理智d其實買對Vera Wang已經好好架喇，仲有set，米豆又未買相架等等其他既野…

- 豆字

頭飾四 - 自家小製作

好耐無update，豆有少少懷疑自己荒廢左呢度。唔得咁樣，要繼續灌水先得。

話說，米豆錢不多，多既係時間。所以希望盡量自己整，慳返d。

連上課去學都揀工聯會，不過，呢個地方都係一個好多臥虎藏龍既地方。

應該咁講，有好多野真係錢既問題，貴d既班當然有佢地既好處，老師小班教學控制度大家，又留意到大家既進度。不過在工聯會上堂就好需要自發性。

多謝老師教導，總算學成。豆會將全部所學既老用哂係自己婚禮上。﹙加油！﹞

呢個花係頭飾黎架，不過整整下佢而家變做襟花都好啊！試過係米度夠大夠誇張，仲食正我地主題色金色。可能已經上左兩個學期，所以到做呢個頭花時已經唔覺得難，整又整得快。諗住真係做襟花就會主家咁多朵都做。好金金啊！

豆有好多頭飾都係到最後上哂堂先決定個製成品，老師每一堂教既製成品都唔一樣，所以就俾左好多靈感豆去改少少﹙老師唔好打我！﹞最後呢度係老師原來材料兩份，變成最後兩個叉。豆媽拎過上手話一隻都好重手，兩張到時會點呢？希望會係送客用佢，唔係就係會Pre-wedding時著湖水藍晚裝時用。

呢個呢一定就唔會係婚禮任何情況下出現架喇，事關豆嫲最唔鍾意就係蝴蝶，所以豆好多選擇都係花花花花花花花，The One都係。所以呢個留係平時用。仲問老師買多份材料整多個俾豆既工人姐姐，襯佢套民族衫既靚喎。

而不得不提既仲有呢頂帽，係米叫豆要造一頂俾佢大婚日戴，豆造了好多個晚上，終於完成，希望米會鍾意啦。不過都幾佔空間，仲要做俾兄弟們，好彩兄弟們話要三寸o者，米呢頂成九寸架。

- 豆字

首飾三 - 我的耳環四五六

就好似題目咁講，豆突然發覺耳環好似買左好多對。

最早時買左一套Swarovski頸鍊連耳環，用作march in時戴既。

之後買左一對小鑽同一對珍珠耳環，用作証婚用既。小鑽仲可以成日戴住係第二第三個洞添。

之後買既第四對要介紹既係，終於都肯買既龍鳳耳環。

豆其實上年就睇中左呢對係周大叔出品既耳環，不過當時金價太貴，呢對要成八千幾蚊！點捨得買丫！呢排金價低左d，而且豆最想搵既就係隻鳳耳環上面帶住既清鑲紅寶石，咁就去周大叔一次過睇，睇下有無岩心水喇。前前後後等左一個星期，終於見到實物。總共試左兩對紅寶，兩對龍鳳。除左我上面買左個對之外，豆仲試多對一對墜既，輕d平d嘛！點知豆媽同米一致認為三條好d，所以最後先揀三條。

豆其實鍾意佢好似一個高音譜號，對於掛名讀音樂既豆黎講梗係就有一定親切感啦。而呢對耳環會過大禮時當金器用，到時應該會再揀多一塊小豬牌，超迷你個隻，好得意！

不過兩對紅寶就無要到喇，已經check左全周大叔最平兩對清鑲，最平個對係三墜隔離個隻，不過實物色紅但唔太通透，貴d個對就係一墜隔離個隻，內部清但深桃紅色唔鍾意。豆媽另外意見就係兩對既台面都唔係幾靚。

不過要好多謝，周大叔為職員，其實豆已連續五六日三日都去，去左三次先買得幾千蚊野，仲左試又試試咁耐。同胞們一去就幾皮幾皮咁買啦。

講完第三對就講第四對喇，第四對當然係豆對清鑲紅寶啦！終於都買到喇，不過係係周XX買。之前其實就係年初見到有對平既，不過無左啦，去返同一間鋪搵同一個價位變左藍寶，加價加到呢！

另外仲去左油麻地地鐵站一間寶石店睇，係有幾百蚊紅寶，不過有d根，有隻幾百蚊既買得過，不過係銀鍍18k金托，當中就只有一對真係18k金，不過要成三千幾，咁我都係去返大行睇喇，其他平既一千幾百既都係銀，氧化得快，一併落隻18k金度就見到失色哂。

仲有去左PX，都係千幾一隻，不過就好細同係桃紅色，仲要係細個穿耳時寶石款既鑲法，um…都係爪鑲靚d。

最後就去左周xx睇，最平個對同周大叔貴d個對價錢差唔多，大細都差唔多，但色啦台面啦通透啦都好d，所以就買左囉。要黎係褂啦，迎賓同敬酒時同小鑽一齊戴既。即係得返送客look未有著落。

講下六喇，就係送客喇！又係清鑲喇，就係圖上個對喇！

其實一直都無諗過買，係有次睇藍寶介子時見到對，原來都好靚架！﹙貪心mode﹞不過當我真係去拎黎既時候，原來兩隻會唔同色，色差都幾大，最後買呢對其實都有輕微偏色，不過就咁睇又唔係好覺。買既時候仲拎埋豆公買俾豆既嫁妝，真係好鍾意好鍾意好鍾意。

後記︰搵紅寶既時候仲見到龍鳳鐲！係有音符架！鏈都有音符啊！！！！！豆媽一見到就知豆一定好鍾意，對龍鳳鐲仲可以合埋同拆開，好得意，豆媽話呢對佢會買喇。

- 豆字

婚鞋一號&二號 - 情歸Easy Spirit

就係因為尋日出左去試裙，所以順個便去左sogo買婚鞋。

我對Alice + Olivia 無架喇，而最後諗過就算著左都高米成寸幾兩寸，算喇。最後去左Nine West旗下買Easy Spirit。講真兩對都好普通，兩對原價都過千，豆真係唔捨得買。但自從上年買左第一對Easy Spirit既鞋之後，呢個brand鞋底真係好舒服，又唔支力，可以彈下彈下都無問題。當然佢係要圖下呢個鞋底先會有明顯效果啦，佢有d平底鞋雖然都係舒服，但就無個底咁厚咁舒服。加上高度著左都仲矮米少少，兩對平時都可以著返，著上去又唔覺高。米仲見我一著個腳步可以跑tim﹗本來買一對變兩對都買，買兩對仲有多95折，所以800蚊都唔洗。

其實都想著d好fancy既款，但係一諗度會仆底，行唔到，好支力，都係揀對舒服既好過。

呢對係迎賓，march in，席間著既。

呢對係敬酒，送客著既。

本來豆諗住big day 証婚著婚紗，
跟住迎賓/march in/席間/敬酒/送客
米聽到話洗唔洗咁多，最後而家暫時意向減左席間個條，march in個條係買左既，如果到時減唔到肥，就著返我件The one。

鞋方面爭一對converse同一對褂鞋就ok，converse應該等出年買對白色日本版，希望有出同買得到，褂鞋應該去冠南華買。

- 豆字

試裙記一 - 百德新街的Peony

尋日，終於第一次去左婚紗店試裙。事源係facebook睇度一條好靚既魚尾裙，又見做緊summer promotion，米又放假，做就左今次既試裙喇。

不過豆大部份都著唔落，試衫要俾100試三件，試左兩件減價款後，其他都著唔落。魚尾裙更加係對腳度上都上唔到，要努力d減減佢之後先再去其他地方試。個兩件著出黎都ok，感覺比較活潑，應該都係因為兩條都係岩岩掂地同係腳眼位置。不過最後咩都無買就走左，因為米對d裙無咩反應，無咩comment。我又唔想著d佢唔鍾意既裙，算啦，再睇過。

不過就係因為咁而家嘈左陣，返到屋企傾返原來就係佢覺得千幾蚊買件二手裙唔太鍾意。同豆阿嫲一樣都好介意二手。其實我又無咩所謂，不過我覺得最重要兩個要互相溝通，既然我又唔係非買不可，所以再慢慢睇啦。

其實呢間鋪d staff都好好人，其實我都一開始表明想睇d減價款，都無乜黑我面算係咁，staff都算 helpful，我著唔落既款都拎多兩條俾我試下，只係我太肥著唔落。

Package方面都係普遍價位四千幾兩套。同場仲有一媽媽試媽媽衫，一pair新人試婚紗。兩個staff各照顧一邊，仲有師父可以即時幫手改。米豆既落眼點竟然係落左係媽媽個邊，因為個媽媽真係著得幾好睇，著起黎修身，又高貴大方。不過米媽豆媽都好似唔會揀呢d款，因為佢兩個太潮喇。

講埋豆最鍾意條魚尾裙，真係好鍾意，希望有一日我可以減到好瘦好瘦，可以著黎影相啦。﹙因為豆既The one已有，係唔會取代都佢既位置既。﹞

- 豆字

晚裝一號 - 媽媽的禮物

星期日一晚睇住我出世個auntie打俾我問我星期二得唔得閒同佢地班太太們去睇婚紗晚裝，其實一開始豆既興趣不大，因為豆既衫都會交俾一個auntie訂造，所以其實又無咩留意一d package，只係通常睇下有無d豆好鍾意既款，取代原本已經揀好左既裙，so far被換落黎既裙都只係得一兩條，所以豆其實都幾長情同專一。被換落黎既通常係被家人講過話唔太鍾意，個款唔夠出之類個d問題。

auntie最後就問豆媽去唔去，而好出奇豆媽去完澳門玩之後明明無乜點訓過，竟然好精神同左一班太太出去睇衫。本身，其實豆諗住只係豆媽會買到野，又或者係完全無收獲。

點知，豆媽返到屋企就拎左條紅色裙出黎俾豆叫即刻試黎睇下。其實豆睇第一眼，條裙普通啦，豆唔會揀既款囉，咁不過豆媽買喎，有d野唔試上身係唔知結果既。所以就試，一試後呢條唔被睇好既裙，出黎效果米都話ok 喎﹗好啦，用黎影pre-wedding啦。因為唔洗300蚊，影完唔要都唔心痛。

媽媽仲買左條豆係唔會著得落既黃色魚尾裙，佢指左豆望住佢可以減到肥出年嫁既時候唔好再咁肥，呢條都只係180蚊。

呢間鋪好似清緊貨，大家有興趣可以上網睇左有無ok既款先上去睇。

Queen's Bridal Co

http://qcshop.shopping.babysky.hk/list.html?pcat_id=e5f153dab91d6b38018fe217bd8e5692

- 豆字

開wow記

之前要結婚既朋友女都開wow，豆就一值都無開，ae，其實豆好懶，要開多樣野會覺得好麻煩。

不過尋日終於都開左，跟住發覺原來好多同我一樣出年結婚既B2B，突破間好似雄心燃燒，有一班戰友一齊準備，一齊為大日子努力，突然好感動，大家都明白大家既處景，結左婚既又會share d意見，等準備緊既我地可以避開左d超級麻煩野。

之後兩邊都打，可能同一張相同一個topic打兩次，不過應該打既野有唔同呱。

- 豆字

新郎禮服一 - Billy & Betty

睇左好多關於豆既野, 今個星期日就去左睇米既野。

就係去左睇禮服。亦都唔知點解，呢方面米豆都好齊心係唔會租既，可能因為米返工要著suit既關係呱，所以就算做禮服其實都可以留黎平時著。

好喇，本身年頭陪一對朋友去試既時候，豆都諗緊係咪都係係返金都阿或百利呢d地方造呢？但係個陣去睇既時候其實岩心水既無乜，所以豆又繼續搵搵搵。

終於，上個星期搵到有幾間心水 …

1. 祥興洋服 ╴係中環既老字號，好多港島區既新人都揀佢，價錢又較平，仲有一班上班族，外國人等等等等。但都因為佢實在太出名，鋪面成日都有好多人，要耐心d等。

2. 分寸洋服 ╴都係中環，不過近1年post就搵唔到喇，要搵日真係親身去睇下，價錢好似仲要平祥興少少，但關布料事既，單靠最平既價錢好難評估係咩質量，但手工好，睇post話uncle paul﹙師父﹞好有性格。

3. 龍將洋服 ╴係佐敦，有唔少明星客，價錢都算平，又係好多新人阿，返工族去幫襯。睇post好似service好d。

4. 彩虹 ╴係元朗，嘩！好遠，但有新人試完compare整體都要比祥興好。

5. Billy & Betty ╴係旺中，不過下個月就搬鋪。係咁多間老師父裡面呢間係新派既，而米豆第一站都係去左呢度睇下。多謝老闆娘既耐心解釋。

咁多間裡面，呢間都係最貴既，因為已經係2000蚊起，而都唔係揀衫先係揀布先！因為老闆娘入既布貨唔多，最多都係夠做十套，有d特別d既布更加可能只係做得一兩套。而布都係意大利英國wool，日本都有。初初同米講既時候佢對呢一點好保留，因為米返工要著suit，而佢都已經係訂造個一班﹙豆都仲係去G2000，H&M，Zara買咋﹞，佢話好多鋪頭都話自己係意大利料，但到最後都係流既。

不過，係米豆係鋪外游度左幾步，老闆娘出黎俾左張卡片叫我地可以去試下，米終於行出左第一步，亦都令佢兩眼發光了。因為咁怕熱既米一試左上身就知d布真係靚料，wool聽落應該係保暖，但其實訂造開既人就知喇，係透氣，四季都著得。米著上身仲感覺到有d風透過，好舒服。﹙其實豆唔明，不過佢搵到佢心目中要既野就最好啦﹞最後，試左好多件，老闆娘依然無黑我地面，因為米豆仲有成年半先big day，而家真係初步咁了解。老闆娘都叫我地返去睇下有咩款鍾意，想點樣襯，諗好哂先。而豆都有問兄弟衫，老闆娘話相宜d既布料係有既，明白個日大家都出力做野，米豆都想為各位出點心意，所以呢樣可以到時再決定。

第一步，豆就好似電視廣告咁”陳太個電飯煲好好用架！”咁樣游說米做呢套套返工兼影Prewedding，仲可以big day著。

註: 圖片為Billy & Betty facebook內下載，借貼


- 豆字

Checklist 一 - 距離Big Day=18個月

米豆婚禮進度表 27 December 2014
出 門 入 門
出門地點:	Harbour Grand(未book)
接新娘遊戲:	諗緊
出門時間:	待定
入門時間:	待定
證 婚
邀請咭:	未諗
註冊時間:	待定
註冊地點:	九龍仔公園(未book)
證婚律師:	Samuel Fung
賓客名單:	有draft
場地佈置:	未諗
佈置細節:	未諗
戒指枕:	未諗
結婚證書套:	未諗
食品/飲品:	未諗
結婚蛋糕:	未諗
音樂:	諗緊
晚 宴
婚宴場地:	百好宴會廳
婚宴席數:	18-22圍(未firm實)
婚宴菜單:	已定
賓客名單 :	有draft
賓客坐位安排:	有draft
囍帖及信封:	未諗
司儀:	已定
席前飲品/小食:	未諗(百好)
紅酒:	未諗(百好)
席前/進場/切蛋糕/上菜/敬酒/送客歌曲:	諗緊
敬酒杯:	未諗
成長片段:	未諗(未必整)
佈置公司:	未諗
小遊戲:	未諗
回禮禮物:	已定
Pre-Wedding 未諗
婚 禮 攝 影 錄 影: Ahgor
埸 地 佈 置
佈置公司:	未諗
主題:	未諗
Theme Color:	已定
Backdrop:	未諗
接待/相簿/油畫/蛋糕檯佈置:	未諗
Candy Corner:	未諗
DIY Menu:	未諗
DIY Table Number Card:	未諗
DIY簽名簿:	未諗
DIY簽名筆:	未諗
DIY Welcome Board:	未諗
DIY Sitting Plan Board:	未諗
化 妝 及 配 飾
新娘/媽媽/奶奶/姊妹/兄弟化妝:	Manny Ting
婚紗頭紗:	未諗
婚紗手套:	未諗
婚紗飾物:	珍珠耳環一對 鑽石耳環一對 珍珠頸鍊(未買)
晚裝飾物:	for 褂頭飾(已定) for march in頭飾(已定) for 敬酒頭飾(已定) for送客頭飾(已定)
結婚戒指:	Tiffany/De beers
金器:	媽媽搞掂
婚 紗 禮 服
新娘婚紗及鞋:	For ceremony – White by VW(已買) 鞋: Converse(未買)
新娘晚裝及鞋:	未定
新娘裙褂及鞋:	未定(錦發大五福)
新娘Girdle/ Nu Bra/乳貼/束褲:	未定
新郎禮服及鞋:	未諗
新郎馬褂及鞋:	未諗
媽咪晚裝及鞋:	未諗
爸爸西裝及鞋:	未諗
奶奶晚裝及鞋:	未諗
老爺西裝及鞋:	未諗
花 品
花球公司:	未諗
襟花/手花:	未諗
送給媽媽奶奶的花:	未諗
兄 弟 姊 妹 團
姊妹/伴娘名單:	已定
兄弟/伴郎名單:	諗緊
伴娘裙:	已定(未整)
姊妹裙及披肩:	已定(未整)
兄弟Tie:	諗緊
兄弟姊妹分工表:	諗緊
花 車
主花車:	諗緊
主花車公仔:	已買(未整衫)
28座van:	未諗
散席大巴:	未諗
喜 慶 儀 式 / 用 品
過大禮日期:	未定
過大禮禮金:	諗緊
過大禮用品:	未諗
回禮利是封、喜字貼紙:	未諗
西餅卡:	未諗
唐餅卡:	未諗
龍鳳被:	未諗
新睡衣:	未諗
上頭用品:	未諗
新郎上頭時間:	未定
新娘上頭時間:	未定
好命婆:	未定
安床/上龍鳳被套:	未定
男女家對聯:	未定
紅傘:	未諗
囍字跪墊:	未諗
敬茶茶具 :	未諗
回門燒豬:	酒樓送
各式利是封:	未諗
Rundown
當日Rundown:	有draft
兄弟姊妹Rundown:	有draft
主婚車 Rundown:	有draft
影相 Rundown:	有draft
其 他
開門利是:	未諗
工作人員利是:	未諗
午餐安排:	未諗
存放賀禮袋 (有鎖):	未諗
存放金器袋 (有鎖):	未諗
Honeymoon
地點:	未諗

註: checklist 係網上面搵再填字，借用

- 豆字