主題顏色一 - Tiffany blue x pearl white

仲記得，想當年肥妹豆仲返緊學既時候，米米仔有一次，就係因為聽到肥妹豆睇中左對Tiffany耳環就儲錢買左俾肥妹豆。其實，肥妹豆收到個下個心係咁跳又好開心。有邊個女仔唔想收到Tiffany架！

點知，當米米仔真係同肥妹豆一齊既時候，想搵返個陣睇到想買又唔敢買既豆介指時，全線停產了！想買都買唔返，唉！好啦，而家就唯有得閒就走去碰下運氣，希望個designer突然興起出返啦。

話返轉頭，就係因為Tiffany，米米仔同肥妹豆就決定用Tiffany blue 黎做主題顏色喇！好多人都話，”又Tiffany blue！？”個個都用呢隻色，無黎新意啦﹗不過肥妹豆確實要Tiffany blue，唔理你之前有一億個人用過啦，都唔關我事，更何況，肥妹豆發覺個個都話要Tiffany blue，但好多時大家既顏色都係偏淺，唔信？

剛剛米米仔買俾肥妹豆既Tiffany 個袋就好正確話俾大家知，其實佢既顏色都唔淺，仲好鬼sharp！換左新包裝既Tiffany又可以俾多d idea 肥妹豆喇，呵呵！

例如用返Tiffany blue x pearl white，用係兄弟姊妹身上，又用係deco度，都好都好。

回禮小禮物都唔錯唔錯，肥妹豆到時要拎住本pantone去揀色先得！


- 肥妹豆字

草地証婚場地二 - 九龍仔公園紫荊園

本來cyberport係肥妹豆同米米仔差唔多係首選既場地黎架喇，點知無得碌草地。我地繼續找尋其他場地，當中要多謝朋友們不停whatapps呀，sms呀，facebook呀等等話俾我地知有咩地方。

今次要講既係康民署管理既地方，係九龍仔公園入邊既紫荊園。九龍仔公園對好多人黎講只記得黎游水，學校sport day黎呢度因為有個運動場。其實初初對呢個地方期望不大，因為係市區，塊草地大極都有個限度啦！點知，世事就係咁出奇不意。

肥妹豆唔識用相機，所以通常都係用iphone影，呢張相真係無經任何修飾從iphone影出黎。佢塊草地足夠肥妹豆係咁碌係咁碌係咁碌！呢度其實就係泳池隔離，一上就到。肥妹豆見到十分興奮，租金唔貴就有咁大塊草地用作証婚，好難得！仲要係市區。

其實康民署總共有六個場地供戶外証婚用，租金都在三千元內(以頭四小時計算)，足夠証婚再閒聊幾句。場外都有張貼該月份已book既日期同時間，無booking既時間會對外開放。

雖然呢個場地咩都無，decoration相對要比較多，而且都無凳，對老人家黎講係比較麻煩，所以落實之前要同康民署傾下有咩可以用先得。

- 肥妹豆字

草地証婚場地一 - 數碼港

肥妹豆去過外國讀書，對個片可以係咁碌既草地好懷念，就連學校門口小小地都有塊。所以，肥妹豆決定要係草地結婚！個種感覺好warm，唔好問點解草地係warm，總之肥妹豆覺得草地結婚係一件好warm既事，肥妹豆覺得外國人既wedding party 比中國人既banquet 更加互動更touch更warm。

未去cyberport之前，我對4/f podium充滿幻想，因為肥妹豆從來未踏足過cyberport呢個地方，又因為抱抱俏佳人係呢度取景，就更覺呢塊草地一定係好靚喇。最後睇埋cyberport租務部既戶外場地更加証實只得4/f呢個地方，肥妹豆就等米米仔放假時lur佢帶我入去喇。

點知，一係去到…

光頭的草條！？

從草地既一端去到另外一端都只需一分鐘，並唔係肥妹仔心目中可以碌既草地。好失望。呢個場睇網上面既人講大概一萬左右，一萬蚊…呢個場…肥妹豆要碌草地呀！！！

失望之制行左落公園個邊見到成片綠油油既草地，不過管理員話呢度雖然係屬cyberport管理，但劃分為公眾地方，不設外租。超失望，不過草既高度本身都去到腳眼甚至更高，蚊都比較多，都係唔係幾適合。


- 肥妹豆字

The One 一 - 婚紗一號

大家好！今日我要介紹一下我買左既個件婚紗。唔好問點解買，乜決定左婚期喇咩﹖其實十劃都未有一劃。買既原因純粹係肥妹豆覺得靚，肥妹豆阿嫲鍾意花。

事源肥妹豆朋友大概2014年會結婚，肥妹豆就陪朋友去一間開倉既婚紗公司望下有咩好野喇。點知，肥妹豆一望呢件就覺得好靚，又閃，又有好多花呀花呀花呀，結果，肥妹豆用左不需一千元帶左佢返屋企。

當肥妹豆手拎住問價錢時，當時化緊妝呀，試緊衫呀，執緊野呀既準新娘呀，化妝師呀，員工呀等等都一齊望哂過黎，肥妹豆個一刻好似俾好多隻狼叮住左咁，仲有新娘問呢件係唔係賣既！個下肥妹豆答左一句”我要左喇喎…”

不過，當肥妹豆滿心歡喜揹住佢返屋企時，阿嫲話舊既唔鍾意，米米仔又話咁快買定做咩而被打沉。

其實肥妹豆覺得真係好靚，原因唔洗一千蚊買到一件全件都要釘花，又閃，又有花花邊，又有拖尾既婚紗…

佢既下場俾我買左個衣袋入住，對褶再對褶再對褶，再放左幾包防潮珠後，掉左上去櫃頂。

大概佢會係我banquet march in 時著啦，因為spot light打落黎一定夠閃嘛！


- 肥妹豆字